خرطوم: (رائیٹ ناوٴ نیوز) سوڈان میں جاری خانہ جنگی کے دوران آر ایس ایف کے جنگجوؤں نے بھارتی شہری آدرش بہیرا کو اغوا کر لیا ہے۔ ویڈیو میں دیکھا گیا کہ مسلح سپاہیوں نے ان سے سوال کیا، ‘کیا تم شاہ رخ خان کو جانتے ہو؟’

آدرش بہیرا کو شہر الفاشر سے اغوا کیا گیا، جو بھارتی ریاست اڑیسہ کے ضلع جگت سنگھ پور سے تعلق رکھتے ہیں۔ شبہ ہے کہ انہیں جنوبی دارفور کے دارالحکومت نیالا منتقل کر دیا گیا ہے۔

آدرش کے اہل خانہ نے بتایا کہ وہ 2022 سے سوڈان میں سوکارتی پلاسٹک فیکٹری میں ملازمت کر رہے تھے۔ ان کی اہلیہ نے بتایا کہ ان کے دو بیٹے ہیں، جن کی عمریں آٹھ اور تین سال ہیں۔

خاندان کی جاری کردہ ویڈیو میں آدرش بہیرا حکومت سے مدد کی اپیل کرتے نظر آتے ہیں۔ ان کا کہنا ہے کہ وہ الفاشر میں ہیں اور وہاں کے حالات بہت خراب ہیں۔

آر ایس ایف نے 18 ماہ کے محاصرے کے بعد الفاشر پر قبضہ کر لیا ہے اور بین الاقوامی فوجداری عدالت نے خبردار کیا ہے کہ ان کے اقدامات جنگی جرائم کے زمرے میں آ سکتے ہیں۔

سوڈان میں بھارت کے سفیر نے کہا کہ الفاشر میں مکمل مواصلاتی نظام تباہ ہو چکا ہے اور آدرش بہیرا کی محفوظ واپسی کے لیے کوششیں جاری ہیں۔