اسلام آباد: (رائیٹ ناؤ نیوز) مسلم لیگ ن کے رہنما رانا ثنا اللہ نے کہا ہے کہ جیل میں طبی معائنے کے وقت اہلخانہ کی موجودگی قانون میں لازم نہیں۔ انہوں نے اپوزیشن کے اعتراضات کا جواب دیتے ہوئے کہا کہ جیل رولز میں کہیں نہیں لکھا کہ اہلخانہ کو بلا کر ان کی نگرانی میں علاج ہوگا۔

رانا ثنا اللہ نے کہا کہ سزا یافتہ افراد کے بنیادی حقوق جیل رولز اور قانون کے مطابق ہیں۔ انہوں نے سانحہ 9 مئی کے واقعات پر مقدمات کے اندراج کو ظلم قرار دینے کی مخالفت کی۔

انہوں نے مزید کہا کہ حکومت اپوزیشن کے ساتھ ہر معاملے پر بات چیت کرنے کو تیار ہے۔ وزیراعظم کی طرف سے اپوزیشن کو بات چیت کی دعوت دی گئی ہے اور 24 گھنٹے میں ملاقات ممکن ہے۔

وزیر قانون اعظم نذیر تارڑ نے کہا کہ بحث کو چند افراد سے جوڑ دیا گیا ہے جو عدالتی کسٹڈی میں ہیں۔ انہوں نے کہا کہ کبھی بشریٰ بی بی کو الگ رکھنے پر اعتراض کیا جاتا ہے، کبھی جرائم پیشہ خواتین کے ساتھ رکھنے پر۔

واضح رہے کہ جیل میں قیدیوں کے حقوق جیل رولز کے تحت دیے جاتے ہیں اور ان پر عملدرآمد حکومت کی ذمہ داری ہے۔