اسلام آباد: (رائیٹ ناؤ نیوز) پاک فوج نے بھارتی آرمی چیف کے اشتعال انگیز بیان کو غیرذمہ دارانہ اور جنگی جنون پر مبنی قرار دیا ہے۔ بھارتی آرمی چیف کے متنازع انٹرویو پر پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ ایسی باتیں ذہنی دیوالیہ پن کی عکاسی کرتی ہیں۔

آئی ایس پی آر نے کہا کہ جوہری طاقت رکھنے والے ہمسائے کو جغرافیے سے ختم کرنے کی بات خطرناک نتائج کی حامل ہے۔ بیان میں مزید کہا گیا کہ بھارتی قیادت پاکستان کے وجود کو تسلیم کرنے میں ناکام رہی ہے، جبکہ پاکستان خطے کی ایک ناقابل تردید حقیقت ہے۔

آئی ایس پی آر نے مزید کہا کہ ماضی میں تکبر اور جنگی جنون نے جنوبی ایشیا کو بحرانوں کی طرف دھکیلا ہے۔ خطے کے امن و استحکام کے لیے ذمہ دارانہ رویہ اپنانا ضروری ہے۔

بیان کے مطابق بھارتی آرمی چیف نے کہا تھا کہ پاکستان کو فیصلہ کرنا ہوگا کہ وہ تاریخ اور جغرافیے کا حصہ رہنا چاہتا ہے یا نہیں۔

واضح رہے کہ بھارت اور پاکستان کے درمیان کشیدگی کے باعث دونوں ممالک کے تعلقات میں تلخی موجود ہے۔