اسلام آباد: (رائیٹ ناوٴ نیوز) اسلام آباد کے ایف-9 فاطمہ جناح پارک میں پہلے خلا باز یوری گاگارین کے مجسمے کی نقاب کشائی کی تقریب منعقد ہوئی۔ اس موقع پر روس کے وزیر توانائی سرگئی سیویلیوف، پاکستانی وزیر برائے توانائی سردار اویس احمد خان لغاری، سفیر البرٹ پی. خوروف، پاکستان کے روس میں سفیر فیصل نیاز ترمذی اور روسی ہیرو و پائلٹ-خلا باز ایلینا سیروا موجود تھے۔

سرگئی سیویلیوف نے کہا کہ یہ ہماری مشترکہ تاریخ کا عظیم کارنامہ ہے۔ ایک بڑی تعداد میں سائنسدان خلائی تحقیق میں مصروف ہیں، اس کام کا فائدہ دنیا کے تمام ممالک کو ہونا چاہیے۔ انہوں نے اعلان کیا کہ آئندہ سال اسلام آباد میں روس-پاکستان کانفرنس منعقد ہوگی جو خلا نوردی اور خلائی بنیادی ڈھانچے کی ترقی کے لیے وقف ہوگی۔

یہ مجسمہ روس-پاکستان بین الحکومتی کمیشن برائے تجارت، اقتصادی، سائنسی اور تکنیکی تعاون کے دسویں اجلاس کے موقع پر نصب کیا گیا۔ اسلام آباد میں روسی سفارت خانہ، بین الاقوامی خیراتی فنڈ “ڈائیلاگ آف کلچرز – یونائٹڈ ورلڈ” کا شکر گزار ہے کہ انہوں نے یوری گاگارین کا مجسمہ فراہم کیا۔ سینٹ پیٹرز برگ انٹرنیشنل مرکنٹائل ایکسچینج کے تعاون سے اس مجسمے کی تنصیب ممکن ہوئی اور پاکستانی حکام کا اس منصوبے کے نفاذ میں مدد کے لیے شکریہ ادا کیا۔