آبنائے ہرمز: (رائیٹ ناوٴ نیوز)۔ آبنائے ہرمز میں زیر سمندر فائبر آپٹک کیبلز کی سیکیورٹی پر خدشات بڑھ گئے ہیں۔ ایران نے خبردار کیا ہے کہ یہ کیبلز خطے کی ڈیجیٹل معیشت کے لیے کمزور نکتہ ہو سکتی ہیں۔

تنگ آبی گزرگاہ پہلے ہی عالمی تیل کی ترسیل کے لیے اہم ہے، لیکن یہ ڈیجیٹل دنیا کے لیے بھی نہایت اہمیت رکھتی ہے۔ یہاں متعدد سب میرین فائبر آپٹک کیبلز بچھائی گئی ہیں، جو جنوبی ایشیا، خلیجی ممالک اور یورپ کو جوڑتی ہیں۔

عالمی انٹرنیٹ ٹریفک کا 99 فیصد منتقل کرنے والی یہ کیبلز کسی نقصان یا رکاوٹ کی صورت میں انٹرنیٹ سروسز، مالی لین دین اور کلاؤڈ سسٹمز کو متاثر کر سکتی ہیں۔ ماہرین کے مطابق یہ نظام جدید ڈیجیٹل معیشت کی ریڑھ کی ہڈی ہے۔

خلیجی ممالک نے حالیہ برسوں میں مصنوعی ذہانت اور ڈیجیٹل انفراسٹرکچر میں اربوں ڈالر کی سرمایہ کاری کی ہے۔ ان کیبلز کی اہمیت کے پیش نظر، ان کی حفاظت پر توجہ دینا ضروری ہے۔

واضح رہے کہ جغرافیائی اور توانائی امور کے ماہرین کے مطابق طویل تنازعے کے دوران سمندری نقل و حرکت بڑھنے سے کیبلز کو حادثاتی نقصان پہنچنے کا خدشہ بڑھ جاتا ہے۔