واشنگٹن: (رائیٹ ناوٴ نیوز)۔ امریکی محکمہ خارجہ نے خصوصی یادگاری پاسپورٹس جاری کرنے کا اعلان کیا ہے جن پر صدر ڈونلڈ ٹرمپ کی تصویر ہوگی۔ یہ اقدام امریکہ کے قیام کی 250 ویں سالگرہ کی تقریبات کے سلسلے میں کیا جا رہا ہے۔

نئے پاسپورٹ کے اندرونی سرورق پر صدر ٹرمپ کی تصویر اور آزادی کی تحریر ہوگی۔ اس کے نیچے صدر کے دستخط سنہری روشنائی میں ہوں گے۔ پاسپورٹ کے بیرونی حصے پر بھی تبدیلیاں کی گئی ہیں۔

محکمہ خارجہ کے حکام کے مطابق یہ پاسپورٹ موسم گرما سے دستیاب ہوں گے اور شہریوں سے اضافی فیس نہیں لی جائے گی۔ ابتدائی طور پر یہ واشنگٹن کے دفتر سے دستیاب ہوں گے۔

ناقدین کا کہنا ہے کہ پاسپورٹ کسی فرد کی نہیں بلکہ ملک کی نمائندگی کرتا ہے۔ ان کے مطابق یہ اقدام ایک متنازع روایت قائم کر رہا ہے۔

یاد رہے کہ ٹرمپ نے اقتدار میں واپس آ کر سرکاری اداروں پر اپنے نام کو نمایاں کرنے کے اقدامات کیے ہیں۔ حال ہی میں محکمہ خزانہ نے ڈالر پر ان کے دستخط شامل کرنے کا اعلان کیا تھا۔