اسلام آباد: (رائیٹ ناوٴ نیوز) وفاقی وزیر اطلاعات عطا اللہ تارڑ نے قومی اسمبلی میں خطاب کرتے ہوئے کہا کہ پی ٹی آئی کی جانب سے دھاندلی کے الزامات بے بنیاد ہیں اور ان کے پاس ثبوت نہیں ہیں۔

عطا اللہ تارڑ نے کہا کہ عمران خان کی حکومت کے دوران مسلم لیگ ن کے رہنما جیلوں میں تھے لیکن ہم نے سیاسی مذاکرات جاری رکھے۔ انہوں نے مزید کہا کہ پی ٹی آئی نے کبھی میثاق معیشت کی دعوت کو سنجیدگی سے نہیں لیا اور صرف مخالفت کی۔

انہوں نے ہری پور انتخابات کا ذکر کرتے ہوئے کہا کہ وہاں پی ٹی آئی کی حکومت کے باوجود مسلم لیگ ن کی جیت ان کے بیانیے کی تردید ہے۔ بابر نواز کی پی ٹی آئی کی نشست سے کامیابی انتخابی عمل کی غیر جانبداری کا ثبوت ہے۔

عطا تارڑ نے مزید کہا کہ میرے خلاف الزامات لگائے گئے لیکن میں عدالتوں میں پیش ہوتا رہا۔ انہوں نے اپوزیشن کو مذاکرات کی پیشکش بھی کی اور کہا کہ سیاست میں بائیکاٹ نہیں بلکہ مقابلہ ہوتا ہے۔