صومالیہ: (رائیٹ ناوٴ نیوز) صومالیہ کے قریب سمندری حدود میں بحری قزاقوں نے ایک آئل ٹینکر پر حملہ کیا اور اسے اپنے قبضے میں لے لیا ہے۔ اس سنگین واقعے میں 11 پاکستانی عملہ بھی شامل ہے، جن کے اہلِ خانہ شدید پریشانی کا شکار ہیں۔

شپنگ ذرائع کے مطابق ‘اونر 25’ نامی جہاز پر 21 اپریل کو حملہ ہوا جس کے بعد قزاقوں نے جہاز کا کنٹرول سنبھال لیا۔ پاکستانی عملہ بھی اسی جہاز پر موجود ہے، جس کی وجہ سے ان کے اہلِ خانہ کو شدید تشویش لاحق ہے۔

حکام کا کہنا ہے کہ پاکستان میری ٹائم وزارت کے ماتحت ڈائریکٹوریٹ آف پورٹس کی جانب سے جہاز پر موجود پاکستانی عملے سے رابطہ نہیں ہو سکا۔ جہاز بھیجنے والی ایجنسی نے بھی کوئی واضح مؤقف نہیں دیا۔

متاثرہ عملے کے اہلِ خانہ نے میڈیا سے کہا کہ انڈونیشین کپتان کی رہائی کے لیے انڈونیشیا کی حکومت قزاقوں سے بات چیت کر رہی ہے۔ انہوں نے پاکستانی حکومت سے فوری اقدامات کی اپیل کی ہے۔

واضح رہے کہ صومالیہ کے قریب سمندری راستے عالمی تجارت کے لیے اہم ہیں، لیکن یہاں بحری قزاقی کے واقعات اکثر سامنے آتے ہیں۔ یہ نہ صرف انسانی جانوں بلکہ عالمی سپلائی چین کے لئے بھی خطرہ بن سکتے ہیں۔