اسلام آباد: (رائیٹ ناوٴ نیوز) وزیراعظم شہباز شریف اور وزیر داخلہ محسن نقوی نے ضلع خیبر میں فتنہ الخوارج کے خلاف کامیاب کارروائی پر سیکیورٹی فورسز کو سراہا ہے۔ انہوں نے 22 دہشتگردوں کی ہلاکت پر فورسز کی پیشہ ورانہ صلاحیتوں کی تعریف کی۔

وزیراعظم شہباز شریف نے دہشتگردوں کی بلا اشتعال فائرنگ سے 10 سالہ بچے کی شہادت پر گہرے دکھ کا اظہار کیا ہے۔ انہوں نے کہا کہ دہشتگردی کے خاتمے کے لیے جنگ جاری رہے گی اور بزدل دہشتگردوں کا یہ عمل انسانیت کے خلاف جرم ہے۔

وزیراعظم نے کہا کہ قوم سیکیورٹی فورسز کے ساتھ شانہ بشانہ کھڑی ہے۔ انہوں نے ملک سے دہشتگردی کے مکمل خاتمے کے غیر متزلزل عزم کا اعادہ کیا۔

وزیر داخلہ محسن نقوی نے بھی فورسز کی بہادری کو سراہا اور کہا کہ قوم کو ان کے دلیر سپوتوں پر ناز ہے۔ انہوں نے قوم کی حمایت سے دہشتگردوں کے مکمل خاتمے کا عزم ظاہر کیا۔

واضح رہے کہ یہ کارروائی فتنہ الخوارج کے دہشتگردوں کے خلاف کی گئی تھی، جس میں 22 دہشتگرد ہلاک ہوئے تھے۔ وزیر داخلہ نے بچے کے لواحقین سے تعزیت کا اظہار بھی کیا ہے۔