واشنگٹن: (رائیٹ ناوٴ نیوز) گورنر سٹیٹ بینک آف پاکستان جمیل احمد نے کہا ہے کہ پاکستانی معیشت مشرقِ وسطیٰ کے بحران کے باوجود بہتر حالت میں ہے۔ انہوں نے یہ بات عالمی مالیاتی اداروں کے نمائندوں سے ملاقات میں کہی۔

انہوں نے بتایا کہ مالی سال کے آغاز کے بعد پاکستان کے کلیدی معاشی اشاریے توقع سے زیادہ تیزی سے بہتر ہوئے ہیں۔ مشرقِ وسطیٰ کے تنازع نے نئے خطرات کو جنم دیا ہے، مگر معیشت ان چیلنجز سے نمٹنے کے لیے بہتر حالت میں ہے۔

یہ خیالات انہوں نے جے پی مورگن، بارکلیز، سٹی بینک، جیفریز اور فرینکلن ٹیمپلٹن جیسے اداروں کے نمائندوں سے ملاقات میں ظاہر کیے۔ یہ ملاقاتیں آئی ایم ایف اور عالمی بینک کی اسپرنگ میٹنگز کے دوران ہوئیں۔

واضح رہے کہ پاکستان نے معیشت کے استحکام کی جانب نمایاں پیش رفت کر لی ہے۔ محتاط زری اور مالیاتی پالیسیوں کے امتزاج سے مالیاتی اور بیرونی ذخائر کو مضبوط بنانے میں مدد ملی ہے۔

یاد رہے کہ معیشت کو اب مشرقِ وسطیٰ کی حالیہ پیش رفت کے باعث توانائی کی قیمتوں اور باربرداری کے اخراجات میں اضافے جیسے چیلنجز کا سامنا ہے۔ حکومت نے کفایت شعاری کے اقدامات کیے ہیں۔