اتقیاگوِک: (رائیٹ ناوٴ نیوز) امریکی ریاست الاسکا کے شمالی شہر اتقیاگوِک میں قطبی رات کا آغاز ہو گیا ہے، جہاں 64 دن تک سورج طلوع نہیں ہوگا۔ یہ غیر معمولی رجحان زمین کے محور کے جھکاؤ کی وجہ سے ہوتا ہے، جس کے باعث اتقیاگوِک میں 22 جنوری 2026 تک سورج افق سے اوپر نہیں آ پائے گا۔

اس دوران شہر مکمل اندھیرے میں نہیں ہوگا، بلکہ روزانہ چند گھنٹوں کے لیے ‘سِوِل ٹوائلائٹ’ کی ہلکی نیلی روشنی موجود رہے گی۔ یہ روشنی سورج نکلنے سے پہلے کی دھیمی چمک کی مانند ہوتی ہے۔

تقریباً 4,400 آبادی والا یہ شہر تاریخی لحاظ سے بھی منفرد ہے جہاں پانچویں صدی عیسوی تک کے آثار موجود ہیں۔ سورج کی غیر موجودگی سے شدید سرد ہوائیں، برفانی ٹھنڈک اور موسم کے تیزی سے بدلتے مزاج کا سامنا کرنا پڑتا ہے۔

الاسکا میں قطبی رات کے دوران درجہ حرارت خطرناک حد تک نیچے گر جاتا ہے اور ‘پولر ورٹیکس’ جیسے برفانی ہوا کے نظام بنتے ہیں جو دنیا کے جنوبی حصوں تک بھی اثر ڈال سکتے ہیں۔

دلچسپ بات یہ ہے کہ اتقیاگوِک میں گرمیوں کے تین ماہ تک سورج مکمل روشنی دیتا ہے، اور بیرو ہائی اسکول کی فٹ بال ٹیم اسی روشنی میں اپنا سیزن کھیلتی ہے۔