اسلام آباد: (رائیٹ ناوٴ نیوز) وزیراعظم شہباز شریف نے کہا ہے کہ پیٹرولیم مصنوعات کی ملکی ضروریات کے لیے مناسب مقدار موجود ہے۔ حالیہ صورتحال میں عوامی ریلیف کو اولین ترجیح دی گئی ہے۔

وزیراعظم محمد شہباز شریف کی زیر صدارت ایک اجلاس ہوا، جس میں ایندھن بچت اور کفایت شعاری کے لیے جاری اقدامات کا جائزہ لیا گیا۔ وزیراعظم نے بتایا کہ وفاقی حکومت نے 125 ارب روپے کی بچت کی، جس سے عوام کو ریلیف فراہم کیا جا رہا ہے۔

وزیراعظم نے مزید کہا کہ اس اقدام سے ملک بھر کے موٹر سائیکلوں اور رکشوں کا ڈیٹا ڈیجیٹائز ہو جائے گا، جس سے مالکان کو حکومتی ریلیف سے مستفید ہونے کا موقع ملے گا۔ صوبائی حکومتوں کو ہدایت دی گئی ہے کہ وہ موٹر سائیکلز اور رکشہ مالکان کو رجسٹریشن کی سہولیات فراہم کریں۔

اجلاس کے شرکا نے عوام سے درخواست کی کہ وہ بچت مہم میں حکومت کا ساتھ دیں اور غیر ضروری سفر سے پرہیز کریں۔ دفاتر اور کام کی جگہوں پر ٹیلی کانفرنسنگ کو ترجیح دی جائے۔ وزیراعظم نے متعلقہ حکام کو چاروں صوبوں، آزاد کشمیر، اور گلگت بلتستان کے چیف سیکریٹریز سے رابطے تیز کرنے کی ہدایت کی ہے۔

واضح رہے کہ عالمی سطح پر پیٹرولیم مصنوعات کی قیمتوں میں اضافے کے باعث حکومت نے بچت اقدامات متعارف کرائے ہیں تاکہ عوام کو زیادہ سے زیادہ ریلیف فراہم کیا جا سکے۔