واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے کہا ہے کہ پاکستان اور بھارت ایٹمی ہتھیار نکالنے لگے تھے، لیکن انہوں نے مداخلت کر کے ممکنہ جنگ کو روک دیا۔ ٹرمپ نے امریکا سعودی بزنس فورم میں خطاب کرتے ہوئے کہا کہ امن کے لیے تاریخی کام کر رہے ہیں اور انہوں نے متعدد جنگوں کو روکا۔ ان کے مطابق، پاکستان اور بھارت کو جنگ سے باز رکھنے کے لیے 350 فیصد ٹیرف لگانے کی دھمکی دی گئی جس کے بعد دونوں ممالک نے جنگی ارادوں کو ترک کر دیا۔

ٹرمپ نے مزید کہا کہ وزیراعظم پاکستان شہباز شریف نے انہیں فون کر کے جنگ رکوانے پر شکریہ ادا کیا اور کہا کہ آپ نے لاکھوں جانیں بچائیں۔ اسی طرح بھارتی وزیراعظم نریندر مودی نے بھی فون کر کے جنگ روکنے پر آمادگی ظاہر کی۔

امریکی صدر نے مزید کہا کہ سعودی ولی عہد کی درخواست پر سوڈان تنازع کے حل کے لیے بھی کام شروع کر دیا گیا ہے، حالانکہ سوڈان ان کی ترجیحات میں شامل نہیں تھا۔