اسلام آباد: (رائیٹ ناوٴ نیوز) وزیراعظم شہباز شریف نے اعلان کیا ہے کہ انڈس اے آئی ویک 2026 ملک کے ٹیکنالوجی منظرنامے کو تبدیل کرنے میں اہم کردار ادا کرے گا۔ انہوں نے کہا کہ حکومت نوجوانوں کو جدید تقاضوں سے ہم آہنگ کرنے کے لیے جامع اقدامات کر رہی ہے۔

وزیراعظم نے انڈس اے آئی ویک 2026 کی افتتاحی تقریب میں شرکت کی اور کہا کہ اس ایونٹ کا مقصد ملک میں مصنوعی ذہانت کے فروغ کو یقینی بنانا ہے۔ انہوں نے کہا کہ نوجوانوں کو جدید تقاضوں کے مطابق تیار کرنے کے لیے لیپ ٹاپ کی فراہمی، ای لائبریریز کا قیام اور تعلیمی شعبے میں ڈیجیٹل اصلاحات شامل ہیں۔

شہباز شریف نے بتایا کہ پاکستان ترقی کی راہ پر گامزن ہے اور لاہور میں سیف سٹی منصوبہ اور پہلی آئی ٹی یونیورسٹی کا قیام ان کی حکومت کی کامیابیاں ہیں۔ انہوں نے ای اسٹامپ پیپر کے اجرا اور لینڈ ریکارڈ کی ڈیجیٹلائزیشن کے ذریعے شفافیت اور بدعنوانی کے خاتمے کی کوششوں کا ذکر کیا۔

وزیراعظم نے کہا کہ پاکستان کی 60 فیصد آبادی نوجوانوں پر مشتمل ہے، جنہیں جدید علم اور مہارتوں کی ضرورت ہے۔ حکومت نے دیہی علاقوں تک رسائی حاصل کرتے ہوئے اے آئی کا نصاب اسکولوں میں متعارف کروا دیا ہے تاکہ مستقبل کی معیشت کے لیے راہ ہموار ہو۔