واشنگٹن: (رائیٹ ناوٴ نیوز)اقوام متحدہ میں پاکستان کے مستقل مندوب عاصم افتخار احمد نے کہا ہے کہ افغانستان سے پاکستان میں سرحد پار دہشت گرد حملوں میں تیزی آ چکی ہے جو پاکستان کے لیے ناقابل برداشت ہے۔ حالیہ برسوں میں افغانستان سے آنے والی دہشت گردی میں نمایاں اضافہ ہوا ہے۔

یہ بیان بلوچستان میں حالیہ مربوط حملوں کے پس منظر میں آیا جہاں سکیورٹی فورسز کی کارروائیوں کے دوران 40 گھنٹوں میں 145 دہشت گرد مارے گئے۔ صوبائی حکومت کے مطابق کلیئرنس آپریشن جاری ہے۔

پاکستان نے طویل عرصے سے افغانستان میں دہشت گردوں کی موجودگی پر تشویش ظاہر کی ہے اور کابل پر زور دیا ہے کہ وہ اپنی سرزمین پاکستان کے خلاف استعمال ہونے سے روکے۔

سفیر نے کہا کہ اقوام متحدہ کے سیکریٹری جنرل بھی افغان طالبان سے سرحد پار دہشت گردی روکنے کی توقع رکھتے ہیں۔ یہ عزم 2020 کے دوحہ عمل کا حصہ تھا۔

انہوں نے مزید کہا کہ پاکستان دہشت گردی کے خاتمے کے لیے تمام ضروری اقدامات کر رہا ہے اور اس مقصد میں پوری طرح پرعزم ہے۔