لاہور: (رائیٹ ناوٴ نیوز) معروف ادیبہ، محقق اور ماہر تعلیم ڈاکٹر عارفہ سیدہ زہرا لاہور میں انتقال کر گئیں۔ ان کے انتقال کی تصدیق پاکستانی ڈرامہ نگار اصغر ندیم سید نے کی۔

ڈاکٹر عارفہ زہرا نے لاہور کالج برائے خواتین یونیورسٹی سے بی اے آنرز، گورنمنٹ کالج یونیورسٹی لاہور سے ماسٹرز اور یونیورسٹی آف ہوائی ایٹ مینوا سے ڈاکٹریٹ کی ڈگری حاصل کی۔ وہ لاہور کالج برائے خواتین یونیورسٹی میں بطور پرنسپل تعینات رہیں اور خواتین کی حیثیت سے متعلق قومی کمیشن کی چیئرپرسن بھی رہیں۔

صدر مملکت آصف علی زرداری اور وزیراعظم شہباز شریف نے ڈاکٹر عارفہ کے انتقال پر اظہار افسوس کیا اور ان کی علمی خدمات کو خراج تحسین پیش کیا۔ وزیراعلیٰ پنجاب مریم نواز شریف نے بھی اظہار تعزیت کرتے ہوئے کہا کہ ان کی سماجی اور تعلیمی خدمات ہمیشہ یاد رکھی جائیں گی۔