ماؤنٹ ماؤنگانوئی: (رائیٹ ناوٴ نیوز) نیوزی لینڈ کے کرکٹرز ڈیون کانوے اور ٹام لیتھم نے ورلڈ ٹیسٹ چیمپئن شپ میں تاریخ کی سب سے بڑی اوپننگ شراکت داری قائم کی۔

نیوزی لینڈ اور ویسٹ انڈیز کے درمیان ٹیسٹ سیریز کا تیسرا میچ بے اوول گراؤنڈ میں جاری ہے، جہاں نیوزی لینڈ نے ٹاس جیت کر پہلے بیٹنگ کا فیصلہ کیا۔

پہلے دن کے اختتام پر نیوزی لینڈ نے ایک وکٹ پر 334 رنز بنائے، جس میں کانوے نے ناقابلِ شکست 178 اور لیتھم نے 137 رنز کی اننگز کھیلی۔

کانوے اور لیتھم نے ویسٹ انڈیز کے خلاف پہلی وکٹ پر 323 رنز بنائے جو ورلڈ ٹیسٹ چیمپئن شپ کی تاریخ کی سب سے بڑی اوپننگ شراکت داری ہے۔

انہوں نے بھارتی اوپنرز روہت شرما اور ماینک اگروال کا ریکارڈ توڑ دیا، جنہوں نے 2019 میں جنوبی افریقا کے خلاف 317 رنز کی شراکت قائم کی تھی۔