دبئی: (رائیٹ ناوٴ نیوز) متحدہ عرب امارات نے جنسی جرائم اور جسم فروشی کے حوالے سے قوانین میں بڑی تبدیلیاں کی ہیں۔ ان اصلاحات کا مقصد بچوں کی حفاظت اور عوامی تحفظ کو یقینی بنانا ہے۔

نئے قوانین کے تحت، اگر کوئی بالغ شخص 18 سال سے کم عمر بچے کے ساتھ جنسی تعلق قائم کرتا ہے تو اسے کم از کم 10 سال قید اور ایک لاکھ درہم جرمانہ ہوگا، چاہے متاثرہ شخص نے رضامندی ظاہر کی ہو۔

جسم فروشی یا بدکاری کی ترغیب دینے والوں کو بھی سخت سزائیں دی جائیں گی، جبکہ متاثرہ شخص کی عمر 18 سال سے کم ہو تو سزا میں اضافہ ہوگا۔

ان قوانین کا مقصد بچوں اور نوجوانوں کو جنسی استحصال اور بدکاری سے بچانا ہے۔ حکام کو مجرم کی سزا مکمل ہونے کے بعد اضافی احتیاطی تدابیر نافذ کرنے کا اختیار دیا گیا ہے۔