واشنگٹن: (رائیٹ ناوٴ نیوز) امریکا نے وینزویلا کے ساحل کے قریب ایک تیل بردار جہاز پر قبضے کے بعد 6 بحری جہازوں اور وینزویلا کے صدر کے خاندان کے 3 افراد پر پابندیاں عائد کر دی ہیں۔

امریکی محکمہ خزانہ کے مطابق یہ اقدام غیر قانونی تیل کی تجارت روکنے کے لیے کیا گیا ہے۔ امریکی اٹارنی جنرل نے کہا کہ یہ جہاز دہشت گرد تنظیموں کی مدد کرنے والے غیر قانونی شپنگ نیٹ ورک سے منسلک ہیں۔

وائٹ ہاؤس کی ترجمان کیرولائن لیوٹ نے بتایا کہ پکڑے گئے جہاز کا تیل ضبط کرنے کا فیصلہ ہوا ہے اور یہ ٹینکر غیر قانونی طور پر ایران کے لیے تیل لے جا رہا تھا۔

وینزویلا کے وزیرخارجہ نے اس امریکی کارروائی کو سمندری ڈکیتی قرار دیتے ہوئے کہا کہ امریکا وینزویلا کے وسائل پر قبضہ کرنے کی کوشش کر رہا ہے۔

واضح رہے کہ امریکی صدر ڈونلڈ ٹرمپ وینزویلا کے صدر نکولس مادورو پر سیاسی دباؤ بڑھا رہے ہیں، اور ان پر مجرموں کو امریکا بھیجنے اور منشیات کی اسمگلنگ میں سہولت کاری کا الزام عائد کرتے ہیں۔