کراچی: (رائیٹ ناؤ نیوز) پاکستان کی معیشت میں استحکام کے دعووں کے باوجود بڑی آبادی مالی مشکلات سے دوچار ہے۔ حالیہ سروے کے مطابق صارفین کے اعتماد کا اشاریہ 65.3 فیصد تک گر گیا ہے۔

ڈن اینڈ بریڈ اسٹریٹ اور گیلپ پاکستان نے مالی سال 2026ء کی تیسری سہ ماہی کے صارفین کے اعتماد کے اشاریے کا 20واں ایڈیشن جاری کیا۔ اس میں صارفین کے اعتماد میں نمایاں کمی کی نشاندہی کی گئی ہے۔

رپورٹ میں موجودہ جذبات اور معیشت کے مستقبل کے بارے میں توقعات کا جائزہ لیا گیا۔ موجودہ جذبات کا اشاریہ 51.8 فیصد تک گر چکا ہے جبکہ مستقبل کی توقعات 78.7 فیصد پر ہیں۔

یہ سروے 1,592 افراد پر مبنی تھا، جس میں مہنگائی اور بے روزگاری کو مالی دباؤ کی اہم وجوہات بتایا گیا ہے۔ 89.3 فیصد نے اشیائے ضروریہ کی قیمتوں میں اضافہ رپورٹ کیا۔

واضح رہے کہ گیلپ پاکستان کے بلال گیلانی نے اس اشاریے کو پاکستان کی معیشت کے لیے مایوسی کا عندیہ قرار دیا ہے۔ رپورٹ میں کہا گیا کہ صارفین کے اعتماد میں بہتری کے لیے واضح اقدامات کی ضرورت ہے۔