تہران: (رائیٹ ناؤ نیوز) ایران کے سپریم لیڈر کے عسکری مشیر جنرل محمد رضا نقدی نے کہا ہے کہ ایران کے 90 فیصد سے زائد میزائل بدستور موجود اور محفوظ ہیں۔ انہوں نے میزائل صلاحیتوں میں کمی کی خبروں کو غلط قرار دیا ہے۔

جنرل رضا نقدی نے ایرانی میڈیا کو انٹرویو دیتے ہوئے بتایا کہ جو میزائل کم ہوئے وہ جنگ کے دوران استعمال ہوئے تھے۔ ان کی جگہ نئے میزائل حاصل کر لیے گئے ہیں، جو ایران کی دفاعی صلاحیت کو برقرار رکھتے ہیں۔

انہوں نے مزید کہا کہ ایران کا میزائل نظام خود کفیل ہے اور طویل عرصے تک برقرار رہنے کی صلاحیت رکھتا ہے۔ ان کے مطابق امریکہ کے دعوے ایران کی میزائل صلاحیتوں کو مکمل طور پر ختم کرنے میں ناکام رہے ہیں۔

امریکی میڈیا کی رپورٹس نے وائٹ ہاؤس کے دعووں پر سوال اٹھایا ہے کہ ان کی فوجی کارروائیاں ایران کے زیر زمین میزائل نیٹ ورکس کو غیر مؤثر نہیں بنا سکیں۔ ان رپورٹس کے مطابق امریکی فضائی دفاعی نظام پر دباؤ بڑھ گیا ہے۔

واضح رہے کہ ایران کی مقامی دفاعی تنصیبات مسلسل میزائل تیار کر رہی ہیں۔ جنرل رضا نقدی نے کہا کہ ایران نے روایتی جنگ لڑی ہے لیکن غیر روایتی جنگ کا سامنا ہوا تو یہ وال اسٹریٹ یا مین ہٹن تک پہنچ سکتی ہے۔