ایران نے امریکی حملے جاری رہنے پر طبل جنگ بجانے کا اعلان کیا ہے، اور ایرانی عوام پہلے سے زیادہ متحد ہو کر دشمن کو جواب دینے کے لیے تیار ہیں۔
تہران: (رائیٹ ناؤنیوز) ایرانی سپریم لیڈر کے مشیر محسن رضائی نے کہا ہے کہ اگر امریکا کے حملے مزید دو سے تین روز تک جاری رہے تو ایران طبل جنگ بجا دے گا۔ انہوں نے کہا کہ مذاکرات اور جنگ کی پالیسی ختم ہو چکی ہے، ایران اپنے دفاع کے لیے تیار ہے۔
ایرانی پاسداران انقلاب کی ایروسپیس فورس کے کمانڈر بریگیڈیئر جنرل مجید موسوی نے کہا ہے کہ ایران کی جوابی کارروائیاں آبنائے ہرمز کی ناکہ بندی ختم ہونے تک جاری رہیں گی۔ انہوں نے کہا کہ پورا ایران دشمن کے خلاف متحد ہے اور شہریوں پر حملے کا سخت جواب دیا جائے گا۔
ایرانی وزارتِ خارجہ کے ترجمان اسماعیل بقائی نے امریکی حملوں کو جنگی جرم قرار دیا ہے۔ انہوں نے کہا کہ ایرانی عوام پہلے سے زیادہ متحد ہیں اور دشمن کو سخت جواب دینے کے لیے تیار ہیں۔
ایرانی وزیر خارجہ عباس عراقچی نے کہا ہے کہ شہداء کا خون رائیگاں نہیں جائے گا۔ انہوں نے کہا کہ ایران اپنی سرزمین کے دفاع کے لیے آخری سانس تک جدوجہد جاری رکھے گا۔
واضح رہے کہ امریکی فوج نے مسلسل ساتویں روز بھی ایران کے مختلف شہروں پر حملے جاری رکھے، جس کے جواب میں ایران کی پاسداران انقلاب نے اردن میں امریکی فوجی اڈے کو نشانہ بنایا۔
