لندن: (رائیٹ ناؤ نیوز) بلوچستان کے ضلع لورالائی کے کاشتکار محمد حسن ترین نے پاکستانی زیتون کے تیل کے برانڈ سے لندن انٹرنیشنل اولیو آئل مقابلے میں گولڈ میڈل جیت لیا۔ تقریباً 1300 بین الاقوامی برانڈز کے درمیان یہ کامیابی پاکستانی زرعی شعبے کے لیے سنگ میل ثابت ہوئی۔

ملکی برانڈ کی اس کامیابی کو ماہرین نے بین الاقوامی معیار کے مطابق ایکسٹرا ورجن اولیو آئل تیار کرنے کی صلاحیت کا اعتراف قرار دیا ہے۔ لندن کا یہ مقابلہ دنیا کے معتبر ترین مقابلوں میں شامل ہے، جہاں معیار اور ذائقہ سخت اصولوں پر جانچا جاتا ہے۔

محمد حسن ترین نے اس کامیابی کو پورے پاکستان کی کامیابی قرار دیتے ہوئے کہا کہ ملک میں زیتون کی صنعت تیزی سے فروغ پا رہی ہے۔ ان کا کہنا تھا کہ پاکستان کا موسم اور زمین زیتون کی پیداوار کے لیے نہایت موزوں ہیں۔

انہوں نے مزید کہا کہ اس کامیابی سے عالمی خریداروں کا اعتماد بڑھے گا جس سے برآمدات اور کسانوں کی آمدنی میں اضافہ ہوگا۔ یہ کامیابی ملک کے دیگر زیتون کاشتکاروں کے لیے بھی حوصلہ افزا ہے۔

واضح رہے کہ پاکستان میں زیتون کی کاشت میں نمایاں اضافہ ہوا ہے، جس کے مثبت نتائج عالمی سطح پر سامنے آنا شروع ہو گئے ہیں۔ حکومتی اور نجی شعبے کی کوششوں سے لاکھوں زیتون کے پودے لگائے جا چکے ہیں۔