لاہور: (رائیٹ ناؤ نیوز) وزیراعظم شہباز شریف نے لاہور میں اپنے بڑے بھائی اور مسلم لیگ (ن) کے صدر نواز شریف سے ملاقات کی۔ نواز شریف نے وزیراعظم کو بجٹ میں عوام کو زیادہ سے زیادہ ریلیف دینے کی ہدایت کی۔

ملاقات جاتی امرا میں ہوئی جس میں وزیراعلیٰ پنجاب مریم نواز، حمزہ شہباز اور سلمان شہباز سمیت خاندان کے دیگر افراد بھی موجود تھے۔ اس ملاقات میں ملکی مجموعی صورتحال پر تبادلہ خیال کیا گیا۔

وزیراعظم شہباز شریف نے نواز شریف کو اپنے دورہ چین کے بارے میں بتایا۔ نواز شریف نے بجٹ میں عوامی ریلیف بڑھانے اور مہنگائی کم کرنے کی کوشش پر زور دیا۔

مسلم لیگ (ن) کے صدر نے کہا کہ وفاق اور پنجاب میں ایسی پالیسیاں بنائیں جو عوام کو ریلیف فراہم کریں۔ دونوں رہنماؤں نے جاتی امرا میں اپنے والد میاں شریف کی قبر پر فاتحہ خوانی بھی کی۔

واضح رہے کہ نواز شریف پاکستان کے سابق وزیراعظم ہیں اور ان کی پارٹی اس وقت وفاقی حکومت میں ہے۔