اسلام آباد: (رائیٹ ناؤ نیوز) قومی اسمبلی کی پبلک اکاؤنٹس کمیٹی کے اجلاس میں انکشاف ہوا کہ اسلام آباد میں 143 ہاؤسنگ سوسائٹیز سی ڈی اے کی اجازت کے بغیر چل رہی ہیں۔ بریفنگ کے دوران بتایا گیا کہ ان سوسائٹیز کی تعمیر میں قانونی تقاضے پورے نہیں کیے گئے ہیں، جس پر آڈٹ حکام نے صورتحال کی نشاندہی کی۔

اجلاس میں بتایا گیا کہ 27.3 ملین روپے کی ادائیگی پاک پی ڈبلیو ڈی کو کی گئی تھی، جو بعد میں سی ڈی اے کو ٹرانسفر ہوگئی، لیکن رقم واپس نہیں کی گئی۔ یہ معاملہ عدالت میں زیر غور ہے اور وفاقی تحقیقاتی ادارہ (ایف آئی اے) نے مزید ٹرائل کی نوٹس جاری کرنے کی اطلاع دی ہے۔

سی ڈی اے کے چیئرمین نے کہا کہ 143 سوسائٹیز کی غیر قانونی تعمیرات کو کنٹرول کرنے کے لیے سپارکو اور سروے آف پاکستان کے ساتھ کام کیا جا رہا ہے۔ 45 موضعوں کو کمپیوٹرائزڈ کیا جا چکا ہے تاکہ مستقبل میں غیر قانونی ہاؤسنگ سوسائٹیز کا مسئلہ نہ ہو۔

واضح رہے کہ اسلام آباد میں غیر قانونی ہاؤسنگ سوسائٹیز کی بڑھتی ہوئی تعداد نے شہری انتظامیہ کے لیے مشکلات بڑھا دی ہیں۔ قانونی تقاضوں کی عدم پیروی سے شہریوں میں بے چینی پیدا ہو رہی ہے۔

یاد رہے کہ سی ڈی اے کو ماہانہ رپورٹ پیش کرنے کی ہدایت کی گئی ہے تاکہ غیر قانونی سرگرمیوں کی نگرانی کی جا سکے۔ سی ڈی اے کا عملہ بھی اس معاملے میں ذمہ دار پایا گیا ہے۔