ممبئی: (رائیٹ ناوٴ نیوز) بھارت کے معروف صنعتکار مکیش امبانی اس سال اپنی دولت میں نمایاں کمی کے باعث ایشیا کے امیر ترین شخص کا اعزاز کھو بیٹھے ہیں۔ اب یہ اعزاز گوتم اڈانی کے پاس چلا گیا ہے۔

بھارتی میڈیا کے مطابق بلومبرگ بلینیئرز انڈیکس کے تازہ ترین اعداد و شمار میں مشرقِ وسطیٰ میں جاری کشیدگی اور معاشی دباؤ کے باعث امبانی کی مجموعی دولت میں نمایاں کمی ہوئی ہے۔ گوتم اڈانی ایک بار پھر ایشیا کے امیر ترین شخص بن گئے ہیں۔

رپورٹس کے مطابق مکیش امبانی کی مجموعی دولت میں اس سال تقریباً 16.9 ارب ڈالر کی کمی ہوئی ہے، جس کے بعد ان کی دولت تقریباً 91 ارب ڈالر رہ گئی ہے۔ یہ ایشیا کے امیر ترین افراد میں سب سے بڑی گراوٹ ہے۔

دوسری طرف گوتم اڈانی کی دولت بہتر رہی ہے اور وہ دوبارہ ایشیا کے امیر ترین شخص بن گئے ہیں۔ ان کے کاروبار زیادہ تر بندرگاہوں، بجلی اور بنیادی ڈھانچے سے جڑے ہیں، جس کی وجہ سے عالمی اتار چڑھاؤ سے محفوظ رہے۔

یاد رہے کہ دنیا بھر میں جاری سیاسی حالات اور توانائی کے مسائل نے بھارت کے بڑے تاجروں پر اثر ڈالا ہے، جس کی وجہ سے امیروں کی دولت میں کمی دیکھی گئی ہے۔ ریلائنس انڈسٹریز کے لیے بھی حالات مشکل ہیں، کمپنی جلد ہی اپنے مالی نتائج جاری کرے گی۔