واشنگٹن: (رائیٹ ناوٴ نیوز) عالمی مالیاتی فنڈ (آئی ایم ایف) نے ورلڈ اکنامک آؤٹ لک رپورٹ 2026 جاری کر دی ہے۔ رپورٹ میں کہا گیا ہے کہ مشرق وسطیٰ کی جنگ نے عالمی معاشی ترقی کو متاثر کیا ہے، جس کی وجہ سے عالمی ترقی کی رفتار 0.2 فیصد کمی کے ساتھ 3.4 فیصد رہنے کا امکان ہے۔

رپورٹ کے مطابق پاکستان میں بھی معاشی شرح نمو سست ہونے اور مہنگائی بڑھنے کی پیشگوئی کی گئی ہے۔ رواں مالی سال میں معاشی شرح نمو 3.6 فیصد رہنے کا امکان ہے جبکہ حکومت نے 4.2 فیصد کا ہدف مقرر کیا تھا۔ پاکستان میں رواں مالی سال میں مہنگائی 7.2 فیصد ہونے کا امکان ہے۔

آئی ایم ایف کے مطابق اگلے مالی سال میں مہنگائی مزید بڑھ کر 8.4 فیصد تک جانے کا خدشہ ہے۔ گزشتہ مالی سال میں مہنگائی کی شرح 4.5 فیصد ریکارڈ کی گئی تھی۔ پاکستان میں اس سال بیروزگاری 7.1 فیصد سے کم ہوکر 6.9 فیصد رہے گی جبکہ اگلے مالی سال میں بے روزگاری مزید کم ہو کر 6.5 فیصد پر آ سکتی ہے۔

رپورٹ میں کہا گیا ہے کہ رواں مالی سال کرنٹ اکاؤنٹ خسارہ جی ڈی پی کا 0.4 فیصد ہو سکتا ہے جبکہ اگلے سال یہ خسارہ جی ڈی پی کے 0.9 فیصد تک جا سکتا ہے۔ جنگ سے عالمی انرجی سپلائی اور مارکیٹس متاثر ہوئیں ہیں اور نئی ترجیحات کے تعین پر زور دیا گیا ہے۔ مشرق وسطیٰ تنازع کی مدت اور شدت مستقبل کی آؤٹ لک کا تعین کرے گی۔

یاد رہے کہ آئی ایم ایف کی ورلڈ اکنامک آؤٹ لک رپورٹ عالمی معیشت کے اہم پہلوؤں کا جائزہ لیتی ہے اور مستقبل کی معاشی پیشگوئیاں کرتی ہے۔ موجودہ عالمی حالات میں یہ رپورٹ خاص اہمیت کی حامل ہے۔