مظفرآباد: (رائیٹ ناوٴ نیوز) آزاد کشمیر کی قانون ساز اسمبلی کے باہر اپوزیشن نے پریس کانفرنس کرتے ہوئے حکومت پر کڑی تنقید کی۔

اپوزیشن رہنما شاہ غلام قادر نے کہا کہ آزاد کشمیر ایک حساس خطہ ہے اور عوامی مسائل پر بات اسمبلی کے اندر ہونی چاہیے۔ انہوں نے پیپلز پارٹی کی حکومت کو واضح اکثریت نہ ہونے پر خبردار کیا کہ اگر رویہ درست نہ ہوا تو عدم اعتماد کی تحریک لائی جا سکتی ہے۔

سابق وزیراعظم راجہ فاروق حیدر نے کہا کہ اسمبلی کے اندر قرارداد مذمت کی منظوری ایک غیرمعمولی اقدام ہے اور وہ پہلے بھی پانچویں وزیراعظم کے آنے کی بات کر چکے ہیں۔

اپوزیشن رہنما خواجہ فاروق احمد نے کہا کہ وہ اسمبلی کی مدت پوری ہونے اور بروقت انتخابات کے حق میں ہیں اور نہیں چاہتے کہ پانچواں وزیراعظم آئے۔

سابق وزیراعظم چودھری انوارالحق نے بتایا کہ اسمبلی اجلاس کے لیے ریکوزیشن جمع کرائی گئی ہے اور حکومت کو ایوان میں جواب دینا ہوگا۔ اپوزیشن نے مطالبہ کیا کہ سیاسی معاملات آئینی دائرے میں رہ کر حل کیے جائیں۔