شارجہ میں پیدائش کے 6 دن بعد بچی کے دانت نکل آئے، ڈاکٹروں نے اسے غیر معمولی قرار دیا۔
شارجہ: (رائیٹ ناوٴ نیوز) متحدہ عرب امارات میں ایک منفرد واقعہ پیش آیا جہاں ایک نومولود بچی کے پیدائش کے صرف چھ دن بعد دانت نکل آئے۔
بچی، مہرہ عبدالرحمان، 3 دسمبر 2025 کو شارجہ کے خلیفہ اسپتال میں پیدا ہوئی تھی۔ اہل خانہ نے گھر میں معائنے کے دوران اس کے منہ میں ایک ننھا سا دانت دیکھا اور فوراً ڈاکٹرز سے رابطہ کیا۔
ڈاکٹروں نے اس کیفیت کو ‘ولادی دانت’ قرار دیا، جو بعض بچوں میں پیدائش کے فوراً بعد یا چند دنوں میں نمودار ہو سکتے ہیں۔ ڈاکٹروں کا کہنا ہے کہ یہ دانت عام طور پر بچے کی صحت کے لیے خطرناک نہیں ہوتے۔
مہرہ کے والد نے بیٹی کے جلد دانت نکلنے پر خوشی اور حیرت کا اظہار کیا ہے۔ بچی کی نشوونما کی مسلسل نگرانی کی جا رہی ہے اور ڈاکٹرز نے واضح کیا ہے کہ کسی تشویش کی ضرورت نہیں ہے۔
