لاہور: (رائیٹ ناوٴ نیوز) لاہور ہائیکورٹ نے ناصر باغ میں درختوں کی کٹائی کے حوالے سے رپورٹ طلب کر لی ہے۔ یہ اقدام سموگ کے تدارک کے لیے دائر درخواستوں پر جاری سماعت کے دوران کیا گیا۔

جسٹس شاہد کریم نے عدالتی سماعت کے دوران کہا کہ حکومت بار بار یقین دہانی کرانے کے باوجود درختوں کی کٹائی کا سلسلہ کیسے جاری رکھ سکتی ہے۔ وکلاء نے بتایا کہ ناصر باغ کے قریب زیر زمین پارکنگ کی تعمیر کے لیے درختوں کو ٹرانسپلانٹ کیا جا رہا ہے۔

عدالت نے ممبر جوڈیشل کمیشن کو ناصر باغ کا دورہ کر کے رپورٹ پیش کرنے کی ہدایت دی، جبکہ وکیل ایل ڈی اے نے درختوں کی کٹائی کی تردید کی۔ جسٹس شاہد کریم نے پنجاب یونیورسٹی کی بسوں کی انسپکشن کی بھی ہدایت کی۔

عدالت نے پانی کے میٹرز کی خریداری پر بھی سوال اٹھائے اور واسا سے لاہور کی زیر زمین پانی کی سطح کے بارے میں رپورٹ طلب کی۔ لاہور ہائیکورٹ نے پارکس میں تعمیراتی کام روکنے کی ہدایت بھی کی۔