تہران: (رائیٹ ناوٴ نیوز) ایران کی وزارت خارجہ نے آسٹریلوی حکومت کی جانب سےسپاہ پاسداران انقلاب اسلامی(آئی آر جی سی) کو دہشت گردی کا سرپرست ریاستی ادارہ قرار دینے کے اقدام کی شدید مذمت کی ہے۔ جمعرات کو جاری بیان میں اس اقدام کو توہین آمیز اور بلاجواز قرار دیا گیا۔

ایرانی وزارت خارجہ نے کہا کہ آسٹریلیا کا فیصلہ غیر قانونی ہے اور یہ بین الاقوامی قوانین و ضوابط کی خلاف ورزی ہے، جو ریاستوں کی خودمختاری کے اصولوں کے منافی ہے۔ بیان میں کہا گیا کہ یہ سیاسی اقدام اسرائیل کے اثر و رسوخ کے تحت کیا گیا ہے اور یہ خطرناک مثال قائم کرتا ہے۔

وزارت نے زور دیا کہ آئی آر جی سی ایران کی مسلح افواج کا حصہ ہے، جس نے ملکی خودمختاری، سلامتی اور دہشت گردی کے خلاف دفاع میں اہم کردار ادا کیا ہے۔ وزارت کے مطابق ایران اپنی مسلح افواج کے وقار کے تحفظ کے لیے تمام ضروری اقدامات کرے گا۔

واضح رہے کہ آسٹریلوی حکومت نے جمعرات کو آئی آر جی سی کو باضابطہ طور پر دہشت گردی کا سرپرست ادارہ قرار دینے کا اعلان کیا ہے۔ آسٹریلیا کے مطابق یہ فیصلہ انٹیلی جنس ایجنسی کی اس تشخیص کے بعد کیا گیا کہ آئی آر جی سی مبینہ طور پر آسٹریلیا کی یہودی برادری کے خلاف حملوں کی منصوبہ بندی میں ملوث رہی ہے۔