اسلام آباد: (رائیٹ ناوٴ نیوز) وفاقی وزیر اطلاعات عطا اللہ تارڑ نے کہا ہے کہ پاکستان تحریک انصاف (پی ٹی آئی) پر پابندی کا فیصلہ سیاسی نہیں بلکہ قانونی جواز پر مبنی ہوگا۔ انہوں نے کہا کہ پی ٹی آئی نے ٹی ٹی پی سے بات چیت کی حمایت کی اور اس کے اقدامات دہشتگردی کی حمایت کی نشاندہی کرتے ہیں۔

عطا اللہ تارڑ نے کہا کہ پی ٹی آئی پر پابندی کی قرارداد پنجاب اسمبلی نے منظور کی ہے اور یہ فیصلہ قانونی بنیادوں پر ہوگا۔ انہوں نے کہا کہ کوئی بھی سیاسی جماعت یا لیڈر پاکستان سے بڑا نہیں ہوتا۔

وزیر اطلاعات کا کہنا تھا کہ پی ٹی آئی نے دفاعی اداروں کو نشانہ بنایا اور ان کے خلاف باتیں کیں۔ انہوں نے مزید کہا کہ پی ٹی آئی کا بیانیہ فوج اور ملکی دفاع کے خلاف ہے اور بھارتی چینلز پر ان کی موجودگی افسوسناک ہے۔