سوات: (رائیٹ ناؤ نیوز) امیر جماعت اسلامی حافظ نعیم الرحمان نے حکومت کو خبردار کیا ہے کہ اگر پیٹرولیم لیوی ختم نہ کی گئی تو روزانہ ملک گیر دھرنے ہوں گے۔ انہوں نے کہا کہ عوام کو ریلیف نہ ملنے پر احتجاج کا دائرہ وسیع کیا جائے گا۔

حافظ نعیم الرحمان نے سوات کے جلسے میں کہا کہ کراچی سے چترال تک ہونے والی تاریخی ہڑتال عوام کی طاقت کا مظہر ہے۔ ملاکنڈ ڈویژن کے عوام نے جماعت اسلامی کا ساتھ دیا، یہ تحریک عام لوگوں کی آواز ہے۔

انہوں نے مزید کہا کہ پیٹرولیم لیوی کی وجہ سے ہر چیز مہنگی ہوگئی ہے اور عوام کو پیٹرول خریدنے پر 35 فیصد زیادہ ادا کرنا پڑ رہا ہے۔ حکومت عوام کی جیبوں پر ڈاکا ڈال رہی ہے۔

واضح رہے کہ ماضی میں ملاکنڈ ڈویژن کے عوام کو ٹیکس میں ریلیف دیا گیا تھا۔ حافظ نعیم الرحمان نے کہا کہ اب حکومت کو عوام کے بنیادی مسائل حل کرنے ہوں گے۔

انہوں نے اعلان کیا کہ اگر حکومت نے مطالبات تسلیم نہ کیے تو احتجاج شدت اختیار کرے گا، پہیہ جام کے بعد پیدل مارچ ہوگا اور پورے ملک میں احتجاج کیا جائے گا۔