اسلام آباد: (رائیٹ ناؤ نیوز) پاکستان کی منفرد تہذیب اور قدرتی حسن نے یونیسکو کی عالمی ورثے کی عارضی فہرست میں جگہ بنالی ہے۔ یونیسکو نے پاکستان کے 12 تاریخی و ثقافتی مقامات کو عالمی ورثے کی عارضی فہرست میں شامل کر لیا ہے، جس کے بعد پاکستانی مقامات کی مجموعی تعداد 37 ہوگئی ہے۔

یونیسکو کی عارضی فہرست میں شمولیت عالمی ورثے کا درجہ حاصل کرنے کی جانب پہلا اہم قدم ہے۔ ان مقامات میں گندھارا، بدھ مت ورثہ، مغلیہ تعمیرات، صحرائی قلعے اور مقامی ثقافت شامل ہیں۔

خیبر پختونخوا کے ضلع چترال کی وادی کیلاش سمیت 4 مزید مقامات کو بھی فہرست میں شامل کیا گیا ہے۔ سندھ کے کوٹ ڈیجی، ناؤکوٹ اور عمرکوٹ کے تاریخی قلعے بھی اس فہرست کا حصہ بن گئے ہیں۔

پنجاب کے پھروالہ قلعہ، روات قلعہ اور سلطان مقرب خان کا مقبرہ بھی عالمی ورثے کی عارضی فہرست میں شامل کیے گئے ہیں۔ ان مقامات کی شمولیت سے قومی ورثے کے تحفظ اور سیاحت میں اضافہ ہوگا۔

واضح رہے کہ یونیسکو کی فہرست میں شمولیت پاکستان کی عالمی سطح پر شناخت اور ثقافتی سفارت کاری کو مزید مضبوط بنانے میں مدد دے گی۔