اسلام آباد: (رائیٹ ناوٴ نیوز) عالمی مالیاتی فنڈ (آئی ایم ایف) نے پاکستان کے بارے میں اپنی تازہ ترین پیش گوئی میں کہا ہے کہ ملک کے دیوالیہ ہونے کا فوری خطرہ ٹل گیا ہے، تاہم ملک کو کمزور ترقی، بھاری قرض اور محدود عوامی ریلیف کے ساتھ استحکام کی تنگ راہ پر چلنا ہوگا۔

آئی ایم ایف نے پیر کے روز پاکستان کے لیے 1.2 ارب ڈالر کی نئی قسط کی منظوری دی ہے۔ فنڈ کی پیش گوئی کے مطابق پاکستان کی اقتصادی ترقی 2024 میں 2.6 فیصد سے بڑھ کر 2026 تک 3.2 فیصد ہو جائے گی، جو کہ 240.5 ملین کی آبادی کے لیے ناکافی ہے۔

پاکستان میں افراطِ زر میں بھی بڑی کمی آئی ہے۔ مالی سال 2024 میں افراطِ زر 23.4 فیصد کے اوسط پر رہا، جبکہ 2025 میں یہ 4.5 فیصد تک گر گیا اور 2026 میں 6.3 فیصد تک پہنچنے کی توقع ہے۔

وزیر اعظم شہباز شریف نے آئی ایم ایف کی تازہ قسط کو پاکستان کی معاشی استحکام اور ترقی کے لیے اہم قرار دیا ہے۔ انہوں نے فوجی سربراہ اور وزیر خزانہ کی کاوشوں کو سراہا اور کہا کہ استحکام کے بعد اقتصادی ترقی کے لیے مزید کوششوں کی ضرورت ہے۔