لاہور: (رائیٹ ناؤنیوز) لاہور ہائیکورٹ بار میں وکلا رہنماؤں نے پریس کانفرنس کی۔ صدر بابر مرتضیٰ نے کہا کہ بانی پی ٹی آئی کو جھوٹے مقدمات میں سزا دی گئی ہے اور وہ دس ماہ سے قید تنہائی میں ہیں۔ حکومت نے عدالتی حکم کے باوجود ان کا علاج نہیں کرایا۔

بابر مرتضیٰ نے مزید کہا کہ لاہور ہائیکورٹ بار اور لاہور بار نے بانی پی ٹی آئی کے حقوق کے تحفظ کے لیے قراردادیں منظور کی ہیں۔ سپریم کورٹ کے حکم پر عمل درآمد نہ ہونے سے بے چینی بڑھے گی۔ عدالت نے شفا ہسپتال میں چیک اپ کا حکم دیا، لیکن حکومت نے پمز ہسپتال میں منتقل کیا۔

انہوں نے کہا کہ حکومت نے سپریم کورٹ کا فیصلہ تسلیم نہ کرکے توہین عدالت کی۔ وزیر قانون نے عدالتی حکم نہ ماننے کا اعلان کیا۔ سپریم کورٹ حکومت کے خلاف توہین عدالت کی کارروائی کرے، ورنہ وکلا پنجاب اسمبلی کے سامنے دھرنا دیں گے۔

سینیٹر حامد خان نے کہا کہ آئین اور قانون کی پابندی نہ ہونے سے انارکی پیدا ہوتی ہے۔ ملک میں دو الگ بڑی عدالتیں بنا کر من پسند فیصلے لینے کا پروگرام بنایا گیا ہے۔ خان صاحب نے خدشہ ظاہر کیا کہ ان کی صحت تباہ کی جارہی ہے۔

یاد رہے کہ بیرسٹر سلمان صفدر نے کہا تھا کہ سپریم کورٹ کا فیصلہ آئین کے مطابق ہے۔ بانی پی ٹی آئی کے خلاف چار سو سے زائد جھوٹے کیسز بنائے گئے ہیں۔ یہ ایک ورلڈ ریکارڈ ہے۔