اسلام آباد: (رائیٹ ناؤ نیوز) سابق وزیراعظم عمران خان کو شفا ہسپتال میں طبی معائنے کے بعد صحت مند قرار دے کر دوبارہ اڈیالہ جیل منتقل کر دیا گیا ہے۔ وفاقی وزیر اطلاعات عطا تارڑ نے بتایا کہ عمران خان کو سپریم کورٹ کے حکم پر حفاظت میں ہسپتال لے جایا گیا تھا۔

عطا تارڑ نے اپنے سوشل میڈیا پیغام میں کہا کہ عمران خان کا معائنہ ماہر ڈاکٹروں کی ٹیم نے کیا، جس میں امراض چشم، امراض قلب کے ماہرین شامل تھے۔ ان کی ہمشیرہ عظمیٰ خان بھی اس دوران موجود رہیں۔

ہسپتال سے واپسی پر عمران خان کو صبح کے اوقات میں جیل منتقل کیا گیا۔ ان کی جیل منتقلی کے دوران سخت سکیورٹی کے انتظامات کیے گئے تھے۔

واضح رہے کہ عمران خان کی جیل سے ہسپتال منتقلی کا فیصلہ سپریم کورٹ نے دیا تھا، جبکہ رجسٹرار آفس نے اس کے خلاف دائر درخواست واپس کر دی تھی۔

یاد رہے کہ عمران خان کی بہنیں اور معالج اڈیالہ جیل کے باہر موجود تھے، جہاں انہیں جیل کے اندر لے جایا گیا۔ وزیر قانون اعظم نذیر تارڑ نے کہا کہ یہ معاملہ اسلام آباد انتظامیہ دیکھ رہی تھی۔