اسلام آباد: (رائیٹ ناؤ نیوز)چیئرمین پی ٹی آئی بیرسٹر گوہر نے اسمبلیوں سے ممکنہ استعفوں کا اشارہ دے دیا ہے۔ قومی اسمبلی میں خطاب کرتے ہوئے انہوں نے کہا کہ شاید چند روز بعد ہم اس اسمبلی کا حصہ نہ رہیں۔بیرسٹر گوہر نے حکومتی طرز عمل پر تنقید کرتے ہوئے جمہوری نظام پر بھی سوال اٹھائے۔ انہوں نے حکومتی ارکان کو مخاطب کرکے کہا، ’’آپ کو اپنے انداز کی جمہوریت مبارک ہو۔‘‘

قبل ازیں میڈیا سے بات کرتے ہوئے چیئرمین پی ٹی آئی بیرسٹر گوہر نے کہا ہے کہ کچھ عناصر مسائل کا حل نہیں چاہتے۔ یہ صورتحال غیر متوقع ہے۔

چیئرمین پی ٹی آئی نے بتایا کہ سپریم کورٹ کا فیصلہ واضح تھا، اگر ابہام تھا تو نظرثانی ہو سکتی تھی۔ بانی پی ٹی آئی کو سپریم کورٹ کے حکم کے تحت شفٹ کرنا ضروری تھا۔

انہوں نے مزید کہا کہ سیاسی مسائل کا سیاسی حل ہونا چاہیے۔ بیرسٹر گوہر نے معاملے پر اپنی حیرت کا اظہار کیا کہ عمران خان کو دوسرے اسپتال منتقل کیا گیا۔

واضح رہے کہ عمران خان کو آج صبح اسپتال سے اڈیالہ جیل واپس لایا گیا۔ اس سے قبل انہیں عدالتی حکم پر شفا اسپتال لایا جانا تھا، تاہم وفاقی وزیر اطلاعات نے بتایا کہ انہیں پمز اسپتال لے جایا گیا۔

وفاقی وزیر اطلاعات عطا اللہ تارڑ کے مطابق، عمران خان کا طبی معائنہ پمز اسپتال میں کیا گیا، جہاں ڈاکٹروں کی ٹیم نے انہیں صحت مند قرار دیا۔ طبی مراحل مکمل ہونے کے بعد عمران خان کو 21 اگست کی صبح جیل منتقل کر دیا گیا۔