واشنگٹن: (رائیٹ ناؤنیوز) امریکی نائب صدر جے ڈی وینس نے اعلان کیا ہے کہ ایران کے ساتھ جنگ ایک نئے مرحلے میں داخل ہو چکی ہے۔ ان کا کہنا ہے کہ معاشی دباؤ امریکہ کا مؤثر ترین ہتھیار بن چکا ہے، جبکہ ایران کی فوجی اور جوہری صلاحیت کو بھی نقصان پہنچایا گیا ہے۔

جے ڈی وینس نے مزید بتایا کہ امریکہ آبنائے ہرمز سے تیل و گیس کی ترسیل جاری رکھنے میں کامیاب رہا ہے۔ ان کے مطابق ایران کی معیشت پر دباؤ بڑھ گیا ہے، اور تہران کو فیصلہ کرنا ہوگا کہ آیا وہ معیشت کا گلا گھٹتا دیکھنا چاہتا ہے یا مغرب سے تعلقات بہتر کرنا چاہتا ہے۔

امریکی نائب صدر کے مطابق ایران کو جوہری صلاحیت دوبارہ بحال کرنے سے روکنا امریکہ کا مقصد ہے۔ اس سلسلے میں تہران پر دباؤ بڑھانے کی پالیسی پر عمل کیا جا رہا ہے۔

امریکی حکام کے مطابق اس حکمت عملی کا مقصد ایران کو عالمی سطح پر تنہائی کا شکار کرنا ہے، تاکہ وہ جوہری معاہدے کی پابندی کرے۔

یاد رہے کہ امریکہ نے ایران پر کئی اقتصادی پابندیاں عائد کر رکھی ہیں، جن کا مقصد ایران کی جوہری سرگرمیوں کو روکنا ہے۔