پشاور: (رائیٹ ناؤ نیوز) خیبرپختونخوا کے وزیر اطلاعات شفیع جان نے پروگرام ‘ریڈ لائن’ میں گفتگو کرتے ہوئے کہا کہ سپریم کورٹ کے 3 رکنی بینچ کا فیصلہ تاریخی ہے۔ ان کے مطابق آج انصاف ہوتا ہوا دکھائی دیا ہے، مگر مارچ جاری رہے گا کیونکہ مطالبات ابھی پورے نہیں ہوئے۔

شفیع جان نے مزید کہا کہ بورڈ فیصلہ کرے گا کہ بانی کب تک شفا اسپتال میں علاج کے محتاج رہیں گے۔ ان کا کہنا تھا کہ بانی پی ٹی آئی کے کیسز میرٹ پر سنے جائیں اور وہ صحتیاب ہونے تک شفا ہسپتال میں رہیں گے۔

انہوں نے بتایا کہ حکومت نے رپورٹ جمع کرائی، ہم نے نہیں۔ ڈاکٹر عظمیٰ بانی کے ساتھ ہوں گی اور میڈیا سے گفتگو نہیں ہوگی۔ شفیع جان نے کہا کہ 265 دن بعد بانی پی ٹی آئی سے بہن کی ملاقات ہوئی۔

شفیع جان نے کہا کہ آج کے فیصلے کے بعد تحریک انصاف کو جو ملا ہے اسے کھونا نہیں چاہتے۔ انہوں نے یقین دہانی کرائی کہ تحریک انصاف اپنی یقین دہانیوں کا پاس رکھے گی۔

یاد رہے کہ تحریک انصاف کے بانی کو علاج کی غرض سے شفا اسپتال میں منتقل کیا گیا تھا۔ ان کے کیسز کے حوالے سے تحریک انصاف کا مطالبہ تھا کہ انہیں میرٹ پر سنا جائے۔