لاہور: (رائیٹ ناؤ نیوز) سابق وفاقی وزیر محمد علی درانی نے کہا ہے کہ ملک میں اس وقت لنگڑا نظام ہے اور آئینی تقاضوں کے مطابق نئے صوبے بننے چاہئیں۔ انہوں نے بلدیاتی اداروں کی عدم موجودگی کو حکومتی نظام کی کمزوری قرار دیا ہے۔

پریس کانفرنس میں محمد علی درانی نے بہاولپور اور ہزارہ کے نئے صوبے بنانے کی تجویز پیش کی۔ انہوں نے کہا کہ ان صوبوں کے قیام کے لیے آئینی تقاضے مکمل ہو چکے ہیں۔

درانی نے مزید کہا کہ ہم اسمبلی اور سینیٹ میں آئینی ترمیم پیش کریں گے۔ خیبر پختونخوا اور پنجاب اسمبلیوں نے متعلقہ قراردادیں پہلے ہی منظور کر لی ہیں۔

ان کا کہنا تھا کہ نئے صوبے عوام کے مسائل کے حل میں معاون ثابت ہوں گے۔ عوام تک مسائل کی رسائی گورننس کی بہتری کا باعث بنے گی۔

یاد رہے کہ محمد علی درانی نئے صوبوں کے قیام کے حامی ہیں اور ان کا مؤقف ہے کہ بھارت اور ایران کی طرح مرحلہ وار صوبے بنائے جائیں۔