جنیوا: (رائیٹ ناؤ نیوز) پاکستان نے اقوام متحدہ کی تخفیف اسلحہ کانفرنس کی صدارت سنبھال لی۔ اس اقدام سے پاکستان نے عالمی سطح پر اہم سفارتی قیادت کا کردار حاصل کیا ہے۔

پاکستان کی جانب سے ایڈیشنل سیکرٹری (آرمز کنٹرول اینڈ ڈس آرمامنٹ) اور ترجمان، سفیر طاہر حسین اندرابی کانفرنس کی صدارت کر رہے ہیں۔ کانفرنس میں دنیا کے 65 ممالک شریک ہیں، جن میں جوہری ہتھیار رکھنے والی ریاستیں بھی شامل ہیں۔

ترجمان دفتر خارجہ نے کہا ہے کہ کانفرنس کی صدارت پاکستان کو ملنا عالمی برادری کے پاکستان کی قیادت پر اعتماد کا عکاس ہے۔ اس کا مقصد اسلحہ کنٹرول اور تخفیف اسلحہ کے معاہدوں پر مذاکرات کو فروغ دینا ہے۔

کانفرنس کی صدارت پاکستان کے لیے عالمی امن اور بین الاقوامی سلامتی کے مباحثے میں مرکزی کردار کا موقع فراہم کر رہی ہے۔ اس پلیٹ فارم پر پاکستان کی موجودگی اہمیت رکھتی ہے۔

واضح رہے کہ پاکستان نے ہمیشہ عالمی اسلحہ کنٹرول معاہدوں کی حمایت کی ہے اور اقوام متحدہ کے فورمز پر فعال رہ کر عالمی امن کے فروغ میں حصہ لیا ہے۔