لاہور: (رائیٹ ناؤ نیوز) وزیر اطلاعات پنجاب عظمیٰ بخاری نے کہا ہے کہ سوشل میڈیا پر جھوٹی خبریں پھیلائی جا رہی ہیں۔ ان کا کہنا ہے کہ فیک نیوز کی روک تھام انتہائی ضروری ہے اور کسی کی پگڑی اچھالنا صحافت نہیں۔

عظمیٰ بخاری نے سی پی این ای کے عہدیداروں سے گفتگو کرتے ہوئے کہا کہ سوشل میڈیا پر گالم گلوچ اور بے بنیاد الزامات کا رجحان بڑھ رہا ہے۔ انہوں نے زور دیا کہ الزام لگانے والوں کو ثبوت بھی فراہم کرنا ہوں گے۔

صوبائی وزیر اطلاعات نے کہا کہ خبر نشر کرنے سے پہلے متعلقہ فریق کا مؤقف ضرور لیا جانا چاہئے۔ بیرون ملک فرار یوٹیوبرز ملک کے خلاف پروپیگنڈا کر رہے ہیں۔

عظمیٰ بخاری نے کہا کہ صحافت ایک نہایت ذمہ دارانہ پیشہ ہے اور حکومت صحافیوں کی فلاح و بہبود کے لیے اقدامات کر رہی ہے۔ انہوں نے کہا کہ الزام لگانے والے سوشل میڈیا صارفین کو ہیرو نہ بنایا جائے۔

یاد رہے کہ کاظم خان نے کہا ہے کہ سی پی این ای نے فیک نیوز کے خلاف پالیسی مرتب کی ہے۔ انہوں نے مزید کہا کہ پریس فریڈم کمیٹی بھی قائم کی گئی ہے تاکہ مس انفارمیشن کو روکا جا سکے۔