لاہور: (رائیٹ ناؤ نیوز) پنجاب حکومت نے صوبے بھر کے سیکڑوں ہائی سکولوں کو ہائر سیکنڈری سکولوں میں اپ گریڈ کرنے کا ارادہ کیا ہے۔ اس اقدام سے طلبہ کو اپنے اداروں میں میٹرک کے بعد ایف اے اور ایف ایس سی کی تعلیم جاری رکھنے کا موقع ملے گا۔

محکمہ سکول ایجوکیشن نے اپ گریڈیشن کے لیے پنجاب بھر کے ہائی سکولوں سے تفصیلی ڈیٹا طلب کر لیا ہے۔ تھرڈ پارٹی انسپکشن کے ذریعے سکولوں کا معائنہ کیا جائے گا تاکہ معیار پر پورا اترنے والے اداروں کو ہائر سیکنڈری کا درجہ دیا جا سکے۔

پنجاب میں اس وقت تقریباً 6 ہزار ہائی سکول موجود ہیں۔ ان میں سے 5 ہزار 800 سکول محکمہ تعلیم کو مطلوبہ معلومات فراہم کر چکے ہیں۔ 795 ہائی سکولوں نے اپ گریڈیشن میں دلچسپی ظاہر کی ہے۔

اس اقدام سے طلبہ کو اعلیٰ تعلیم کے مزید مواقع ملیں گے اور ان کے تعلیمی کیریئر میں بہتری آئے گی۔ ہائر سیکنڈری درجہ ملنے سے طلبہ کو اپنے ہی ادارے میں مزید تعلیم حاصل کرنے کی سہولت ملے گی۔

یاد رہے کہ اس سے قبل طلبہ کو ہائر سیکنڈری تعلیم کے لیے نئے اداروں میں داخلہ لینا پڑتا تھا، جس سے ان کے تعلیمی سفر میں رکاوٹ آتی تھی۔