اسلام آباد: (رائیٹ ناؤ نیوز) وزیر توانائی اویس لغاری نے کہا ہے کہ پاکستان توانائی کے شعبے میں تاریخی تبدیلی سے گزر رہا ہے۔ انہوں نے بتایا کہ ملک میں سولر پاور کی استعداد 38 ہزار میگاواٹ تک پہنچ چکی ہے۔

اویس لغاری نے سولر، اسٹوریج اینڈ فلیکسیبلٹی 2026 کانفرنس میں کہا کہ بجلی کی اضافی پیداوار دن میں ہوتی ہے جبکہ شام میں طلب بڑھ جاتی ہے۔ بیٹری انرجی اسٹوریج سسٹمز بجلی کی ترسیل کے استحکام کے لیے ضروری ہیں۔

وفاقی وزیر نے کہا کہ مقامی وسائل سے پیداوار ملکی توانائی خودمختاری کو مضبوط بناتی ہے۔ قطر سے آر ایل این جی سپلائی متاثر ہونے پر رات کو لوڈشیڈنگ کا سامنا کرنا پڑا۔ دن کے وقت سولر بجلی دستیاب ہونے سے صورتحال بہتر رہی۔

انہوں نے کہا کہ حکومت 2035 تک صاف توانائی کا حصہ 90 فیصد تک بڑھانا چاہتی ہے۔ بیٹری اسٹوریج کے بغیر یہ ہدف حاصل نہیں ہو سکتا۔ حکومت بیٹری انرجی اسٹوریج کی مقامی صنعت کے فروغ پر توجہ دے رہی ہے۔

یاد رہے کہ پاکستان کی بجلی پیداوار میں صاف توانائی کا حصہ 55 فیصد تک پہنچ چکا ہے۔ وزارتِ صنعت مقامی بیٹری مینوفیکچرنگ پالیسی کو حتمی شکل دے رہی ہے۔