اسلام آباد: (رائیٹ ناوٴ نیوز) الیکشن کمیشن آف پاکستان نے بیرسٹر گوہر علی خان کو پاکستان تحریک انصاف کا چیئرمین تسلیم کرنے سے انکار کر دیا ہے۔ کمیشن نے واضح کیا ہے کہ پی ٹی آئی کے انٹرا پارٹی انتخابات کا معاملہ زیر التواء ہے اور لاہور ہائیکورٹ کا اسٹے آرڈر موجود ہے، جس کے باعث کسی فرد کو چیئرمین کے طور پر قانونی حیثیت دینا ممکن نہیں۔

کمیشن کے مطابق بیرسٹر گوہر علی خان کو پارٹی چیئرمین کے طور پر کوئی آئینی اختیار نہیں دیا جا سکتا۔ تجزیہ کاروں کا کہنا ہے کہ اس فیصلے سے پی ٹی آئی کے اندرونی بحران میں شدت آ سکتی ہے اور قانونی پیچیدگیاں بڑھ سکتی ہیں۔

گزشتہ روز بیرسٹر گوہر علی خان نے اس خط کی تصدیق کرتے ہوئے کہا کہ الیکشن کمیشن نے باضابطہ طور پر انہیں چیئرمین تسلیم نہ کرنے کا خط لکھا ہے۔