اسلام آباد: (رائیٹ ناؤ نیوز) بین الاقوامی کریڈٹ ریٹنگ ایجنسی اسٹینڈرڈ اینڈ پورز (S&P) نے پاکستان کی طویل مدتی انسٹرومنٹس کریڈٹ ریٹنگ کو منفی بی سے بڑھا کر بی کر دیا ہے۔ اس اقدام کے نتیجے میں پاکستان آٹھ برس بعد دوبارہ بی کیٹیگری میں شامل ہو گیا ہے۔

پاکستان کی کریڈٹ ریٹنگ میں بہتری آئی ایم ایف کے تعاون سے جاری اصلاحات، مالیاتی کارکردگی کی بہتری اور زرمبادلہ ذخائر میں اضافے کے باعث ہوئی ہے۔ وزیراعظم شہباز شریف نے اس تبدیلی کا خیرمقدم کیا ہے۔

وزیراعظم نے کہا ہے کہ یہ تبدیلی ملکی معیشت کے لیے اہم سنگِ میل ہے اور حکومت کی مؤثر معاشی پالیسیوں کا ثبوت ہے۔ انہوں نے معاشی استحکام اور اصلاحاتی اقدامات کی تعریف کی ہے۔

اس پیش رفت سے بین الاقوامی سرمایہ کاروں کا اعتماد بڑھے گا اور سرمایہ کاری کے نئے مواقع پیدا ہوں گے۔ پاکستان کی معیشت ترقی کی رفتار میں مزید اضافہ کرے گی۔

واضح رہے کہ حکومت نے معیشت کو استحکام دینے، ٹیکس نظام کو بہتر بنانے اور مالی خسارے میں کمی کے لیے سخت فیصلے کیے ہیں۔ ان اقدامات کے مثبت نتائج عالمی سطح پر تسلیم کیے جا رہے ہیں۔