ممبئی: (رائیٹ ناؤ نیوز) بالی وڈ اداکار اکشے کمار نے ممبئی میں 20 کروڑ روپے مالیت کے 4 فلیٹس فروخت کر دیے۔ یہ فروخت ایک ماہ کے اندر عمل میں آئی ہے جس نے جائیداد مارکیٹ میں ہلچل مچا دی ہے۔

پراپرٹی رجسٹریشن ڈیٹا کے مطابق، اکشے نے 30 جون 2026 کو ملنڈ ویسٹ میں اوبرائے اینگما کی 18 ویں منزل پر 2 لگژری اپارٹمنٹس 12.38 کروڑ روپے میں فروخت کیے۔ دونوں اپارٹمنٹس کا مجموعی رقبہ 1886 مربع فٹ اور 3 پارکنگ اسپیسز بھی شامل ہیں۔

اکشے کمار نے یہ فلیٹس 2017 میں 9 کروڑ روپے میں خریدے تھے، جنہیں فروخت کر کے انہوں نے 3.3 کروڑ روپے کا منافع حاصل کیا۔

جون 2026 کے آغاز میں بھی اکشے نے بوریولی ایسٹ میں اوبرائے اسکائی سٹی کے 2 فلیٹس 7.10 کروڑ روپے میں فروخت کیے تھے۔ اس فروخت سے ان کے مجموعی منافع میں مزید اضافہ ہوا ہے۔

یاد رہے کہ اکشے کمار کا شمار بالی وڈ کے ان اداکاروں میں ہوتا ہے جو اپنی سرمایہ کاری کے لیے جائیداد کو ترجیح دیتے ہیں۔