اسلام آباد: (رائیٹ ناوٴ نیوز) تحریک انصاف نے 27 ویں آئینی ترمیم کے معاملے پر سینیٹر سیف اللہ ابڑو کو پارٹی فیصلے کی خلاف ورزی پر شوکاز نوٹس جاری کر دیا ہے۔ یہ نوٹس تحریک انصاف کے سینیٹ میں پارلیمانی لیڈر سینیٹر علی ظفر کی طرف سے جاری کیا گیا، جس میں سیف اللہ ابڑو سے 7 روز میں تحریری وضاحت طلب کی گئی ہے۔

شوکاز نوٹس کے متن میں کہا گیا ہے کہ سینیٹر سیف اللہ ابڑو کو 27 ویں آئینی ترمیم کی مخالفت کی واضح ہدایت دی گئی تھی، مگر انہوں نے پارٹی فیصلے کی خلاف ورزی کی۔ پارٹی نے وضاحت طلب کی ہے اور اگر 7 دن کے اندر جواب جمع نہ کرایا گیا تو تادیبی کارروائی کی جا سکتی ہے۔

پارٹی ذرائع کا کہنا ہے کہ تحریک انصاف نے 27ویں ترمیم کی منظوری کو سنجیدگی سے لیتے ہوئے پارلیمانی نظم و ضبط برقرار رکھنے کے لئے ضروری اقدامات کیے ہیں۔