ماسکو: (رائیٹ ناؤنیوز) یوکرین نے روسی دارالحکومت ماسکو پر بڑے حملے میں 500 سے زائد ڈرونز داغے۔ اس حملے میں چار افراد ہلاک اور درجنوں زخمی ہوئے۔ ہلاک شدگان میں بھارتی شہری بھی شامل ہے۔

خبر رساں ایجنسیوں کے مطابق یہ حملہ ہفتے کی رات شروع ہوا اور اتوار تک جاری رہا۔ ماسکو اور دیگر روسی علاقوں کو نشانہ بنایا گیا۔ حکام نے بتایا کہ تین افراد ماسکو میں جبکہ ایک شخص شمال مشرقی علاقے میں مارا گیا۔

ماسکو کے میئر نے کہا کہ روسی فضائی دفاع نے 120 سے زائد ڈرونز کو مار گرایا۔ حکام کے مطابق حملے میں متعدد عمارتوں اور بنیادی ڈھانچے کو نقصان پہنچا۔ زخمیوں میں کچھ افراد آئل ریفائنری کے قریب موجود تھے۔

روسی وزارتِ دفاع نے دعویٰ کیا کہ 556 یوکرینی ڈرونز کو تباہ کیا گیا۔ یوکرین نے بھی دعویٰ کیا کہ روس نے 287 ڈرونز داغے جن میں سے زیادہ تر تباہ ہوگئے۔

واضح رہے کہ یوکرین اور روس کے درمیان کشیدگی میں اضافہ ہو رہا ہے۔ دونوں ممالک ایک دوسرے کے توانائی اور دفاعی انفراسٹرکچر کو نشانہ بنا رہے ہیں۔